超人能量——鄧寇克求生錄

  電影鄧寇克大行動,拍得扣人心弦,緊張刺激。

  重回歷史現場,睇到三十萬英國士兵,排晒長龍等候上船,一心以為等船返屋企,其實,係等死,因為,英國軍方唔夠船,由得英國士兵係海灘上莊嚴站立,等待德國飛機,掉個炸彈下來,睇吓邊個唔好彩,戰爭講到底,係好運和不好運之爭。

  海灘上,兩個二等兵,不想等死,想盡辦法,一定要打尖上船。

  浮生於世,職場如戰場,不想學鄧寇克士兵,排隊等運到,就要學兩個小兵,不斷度橋逃生。

  一個炸彈下來、死傷枕藉,人人見到屍體,他們是見到機會,立刻換上軍服扮作救護員,抬起擔架奔向碼頭,因為、傷兵優先,可以博大霧上船。

  千辛萬苦上到船,長官下令,傷兵可以上,救護兵撤退,無功而還,更要由龍頭打回龍尾,重新排過。

  做人要醒目,不被命運擺弄,躲在碼頭不排隊,再等機會,終於,又上到船。

  你以為行運,點知,未出到海中,已經中魚雷,船翻檣傾,全體棄船,又回到大海。

  腦筋急轉彎,就係命運急轉彎,又換個軍服,扮高地兵團,又再插隊,可以上到船,點知開不到船,等潮漲,水未到,德軍子彈飛到,慘成箭靶。

  鄧寇克救生啟示,就係見機行事,隨時變身,一碌木等運到,好快玩完,寧鑽空子,勿信大隊,戰爭就係人生,求人不如求己。

林超榮

hd