超人能量——換機,有悲喜

  蘋果預告出新機,係十周年紀念的蘋果X,議論紛紛之際,卻準備推出市場的不是十號X,而係八號仔。

  蘋果迷都話有無搞錯,按兵不動,我不是追機一族,本來唔關我事,但係,三個女都已升呢,要做果迷,蠢蠢欲動「玩」機,自然要打我荷包主意。

  阿女立刻反駁,阿爸,一年轉一次的是玩機,我們三年才轉一次,係換機。

  阿女換機,我都有好處,就係我也可以玩玩機。

  她們轉了新手機,舊的如何辦呢?就由我接二手。不用浪費,自己也換機。

  真係牛食草,馬食穀,老竇賺錢仔享福,阿女換機,老竇可以轉個新look。

  講起手機,曾經是教兒育女一大問題,猶記得,不過係幾年前,一班大男人,講起仔仔女女上中學,個個嚷着買新機,老竇,你話點辦?

  一個大男人想出好橋,佢話:阿仔要機,他就買新機。

  嘩,你咁闊佬。

  佢話:唔係,小朋友要電話,新機不行,於是,他就買部新機,將舊一部手機,轉給阿仔。小朋友用舊機,掉了,也不肉痛,反正他有機用就成啦。

  這一條好橋,係一舉兩得——機!

  唉!時光荏苒,歲月如梭,轉眼間,阿仔阿女都長大,時移世易,輪到阿女換機,你又唔捨得,只好自己執仔女的二手機了。

  一來可以慳錢環保,二來,換機潮流,我們都不急趕,就交由年輕人追Phone了。

林超榮

hd