超人能量——兩犬為哭

  我不算係好愛狗之人,但是,二十年來,家中養狗的日子從無間斷,曾經有兩段時間,家中更養過兩隻狗。

  老人家說,兩犬為哭,養狗切勿開雙,我不信,卻應驗,養了一隻雪橇,加隻唐狗,成日狗咬狗骨,你追我咬,我咬你吠,家嘈屋閉。專家說,狗仔暴躁,因為無異性朋友,帶他們去絕育手術,脾氣會好一點,而且,條命又會長一點。

  那天帶兩隻狗絕育,手術費加留院費,成萬蚊落樓。兩犬為哭,信啦,哭嗰一個係我。

  醫狗貴過醫人,香港地係人都知,你唔信,不妨試吓,你出街畀隻狗咬到,去公立醫院,打針睇症,三百蚊搞掂;你試吓,你隻狗同人隻狗打架,咬傷人地隻狗,對方帶狗去驗傷,要你賠湯藥費,無一萬蚊都行唔出門口。不過,我鼓勵狗仔,你堅持,捱多三五七年,當城大第一屆獸醫畢業出來,情況改觀,因為,城大係舊年自辦獸醫課程,收咗十二個學生,讀咗大半年,進展良好,有望畢業之後,提供本地獸醫服務,市場有所競爭,水準提高,收費下調。

林超榮

hd