超人能量——肥馬有火

  肥馬向來形象和善,公關了得,估不到一句「我話OK就OK……」被人窮追猛打,難道,真的是他所言早上沒有祈禱,還是,天口太熱,不是紙包不着火,而是問到佛都有火。

  我們這輩打工仔,工作出亂子,老闆追究,都會勇於解釋。

  有一次,跟老闆睇片,忽然死機,「點解啲畫面變咗色?」

  「老闆,係咁嘅,因為,拍嗰一部機係android,用apple機剪接,之後又用另一個system電腦特技,一時出咗保護制式,因此,畫面就……多一層紅色。」

  老闆更怒,以為你搬出一大堆他聽不懂資料來騙他,「呢一啲咁高技術嘅資料,你唔好講給我聽,我只係問你一句,幾時OK就得。」

  太高深的資料,老闆聽不明,以為你耍他。

  記者打爛沙盤問到篤,天公地道,問極都問唔完,難免有火。人始終有情緒,O依家,肥馬發火的新聞,全城皆知,比高技術資料更搶眼球。記者都算可以交差。

  情侶反臉,通常係女朋友不斷追問,男友如何解釋都不滿意,最後反臉,分手原因係「態度」問題,原本那件事,已不重要。

  如果,繼續上綱上線,指肥馬態度傲慢,不適合做公職,要拉他下馬,又過了火位。你家裏的外傭,忽然頂你一句,態度傲慢,你也不會立刻炒她。因為,炒咗她,第二日,就無人做家務。

  動不動拉人下馬,已不是態度問題,是玩政治把戲了。

林超榮

hd