超人能量——足球改革狂想

  今屆世界盃,八強已定。

  感覺係戲碼太弱,你話瑞典、烏拉圭……打得點好,都不夠卡士。

  就好似一部電影,入場前,海報擺出係周潤發、劉德華、成龍……點知他們出場三分鐘就收工,留低啲二線球隊,沒有了阿根廷、德國,球迷唔單止無癮,直頭係俾人搵笨啦!

  德國、阿根廷未能入八強,原因何在?因為,他們太強,強弱對壘,弱隊死守,守足全場,二十一個球員塞在半場,場波悶到飛起,點會好睇?

  進入八強,繼續唔好睇,因為,大家踢得唔夠放,要兩隊波放開來打,一定要足球改革,我提議……

  取消個越位啦,入波成日拗,有無越位呀?個個塞喺禁區,攻極都攻唔入,就係越位,越位破壞球賽節奏,越位破壞球員感情,破壞了球賽……沒有越位,肯定場波好睇好多,如果,有一個攻擊球員留係對方半場,對方必然又留一個防守球員係半場,那就不會出現密閘死守。

  一下子取消越位可能難以適應,我提議,上下半場最後十分鐘取消越位,你話得否?

  仲有,最無癮係紅牌,成日又拗撬,提議在黃牌和紅牌之間,來一個「橙」牌,都係趕出場,不過,離場十五分鐘,之後可以再出場。一場超級大賽,一隊少了一個人,場波又唔好睇。

  足球真係需要大改革,唔好墨守成規,今屆都用了VAR,又公道,又公開,與時並進,改革無話唔得。

林超榮

hd