超人能量——好笑到──死

  港珠澳大橋通車,三個焦點……

  習主席開幕式致詞會講乜,林鄭行咁快博乜,崔世安的普通話你聽到佢噏乜?我不會笑崔特首的,因為,我的普通話跟他差不多。普通話講不好,沒有問題,不說就是了。偏偏,我又要講,唔講就無飯開。

  大橋開通前一日,我去新加坡電視台講課,題目是「從差利卓別靈到羅賓威廉斯之死。」羅賓威廉斯一代喜劇天才,忽然自殺,令人惋惜。差利比羅賓早出道半個世紀,兩人對比一下,非常有意思,羅賓威廉斯說對又多又快,喋喋不休,相反,差利拍的都是默片,全是動作設計,粒聲都無。差利出世貧窮、六歲就代母登台,父親未到三十歲,酗酒而亡,母親入精神病院,他就和哥哥去馬戲班,應徵做童星,精靈可愛,開始搞笑搵食。

  相反,羅賓是咬着銀匙出世,家境富裕,父親是推銷經理,遊走全國,他們經常搬大屋,爸媽時常不在家,為了吸引父親注意,他童年就在家中講笑話。差利的默片動作設計,千垂百煉,自編自導自演,他寫劇本,每日滿意的產量是一千字。

  羅賓拍戲不開心,減壓方式,晚上去做棟篤笑,最擅長玩即興,台上有一個抽東西環節,工作人員放下不同禮物,事先不用告訴他,他說這樣即興創作,他就會減壓,好high。這是自殺式表演,唯有靠「啪藥」找維持,唔死有鬼。

林超榮

hd