超人能量——與神對話

  跟樓神趙國雄飯聚,一張長枱,坐在我對面,主菜吃的,不約而同,都點鹿肉。

  趙Sir是我浸會的師兄,上一次浸會校慶,同踏台板,他竟向我請教演技之道,唯有班門弄斧一番。

  我在電影學院兼職教書,他回校修讀博士,偶然在校園canteen相遇,我又請教他讀書之道。

  他說,還有五年時間,要交論文,順利的話,他是浸會大學年紀最大的博士了。我讚歎,好學不倦,不知老之將至。

  一邊吃鹿肉,有逐鹿中原之味道。中美貿易戰火殺到埋身,前瞻二○一九經濟,烽煙四起,大家等候樓神開腔。

  神曰,香港樓市會下跌三成。大家碌大隻眼,放下刀叉。言下之意,呢一個時候,大家唔好入市。

  不過,自住係無問題,如果係炒家就一身蟻。樓神早有分析,重災區會係納米樓,尤其是偏遠地區。他補充,重中之重,災中之災,是車位。先前大手入市的車位持有人,會和呢幾日的天氣掛鈎,凍到騰騰震。

  我大力拍手叫好,政府出錢出力,就係降低樓價,下跌三成係好事,市民可以執平樓。何懼之有。大家儲備彈藥,撈底入市。

  朋友獻計,如果係真,應該嗱嗱聲賣咗層樓、租個迷你倉、租個服務式公寓,假設係一千萬套現做定期,如樓價跌三成,一年使費約三十萬,愈跌得多愈好計數、跌定又可以買間大啲!

  人類思考,神就微笑。樓神不語。

林超榮


hd