超人能量——電影節焦點—大哥大

    三月,乍暖還寒,既是考試季節,又是看電影好時光。

  每年,香港國際電影節在三月中開始,同學們考完DSE就可以睇戲。猶記得年少時,我都是預科之後才升格為電影發燒友,「暴」睇電影節。小冊子一出,就開始狂咪,讀書都無咁勤力,各場電影要小心安排地點場次,以免訂票時有殺錯無放過,搞到撞場,被逼割愛。

  我買票策略是,寧缺毋濫,因為,最後衝刺時,必然有人讓飛,可以執死雞。

  電影節是典型文青活動,一年一度,踏入節日高潮,穿梭各放映場地,撞口撞面,不是「走堂睇戲」的同學,就是失散多年朋友,氣氛特別親切。

  當年,電影公司老闆喝令我們年輕編劇禁看藝術片,以免遠離觀眾。不過,他們都支持編劇睇電影節,因為,二百部來自世界各地冷門電影,一生人可能只有一次機會睇到,我們帶齊筆記入場抄橋,藝術片變商業片,偷咗都無人知。

  年前,馬會曾贊助活動,影評人帶中學生睇電影節,散場之後,我和同學在戲院旁邊小店,飲吓咖啡,傾吓電影,文藝氣息非常濃厚,難得的電影節風景。

  今年,電影節焦點是影壇大哥洪金寶。他縱橫電影業半世紀,帶領香港動作片起飛,深得業內敬重。大哥的座談會由我主持,不勝榮幸。想當年,初入嘉禾跟大哥工作一段日子,今日重遇,興奮之情,不減少年初遇。

林超榮

hd