香港美事——全港「動」起來

  上星期日,由旅發局主辦嘅第二屆「香港單車節」舉行,今屆共設有九項活動及比賽,係本港歷來最大型的單車活動,吸引超過四千六百名本港及國際單車選手參加。

  清晨五點半,近二千三百名參加五十公里挑戰組賽事嘅選手首先出發。今年挑戰組賽事由三十五公里延長至五十公里,賽道首次覆蓋「三隧三橋」,途經長青隧道、汀九橋、青馬大橋、南灣隧道、昂船洲大橋、尖山隧道,返回尖沙咀終點。比賽之後有選手同我講起步時間太早,話踩完五十公里賽事返到屋企,佢太太都未起身。其實,我哋已經盡量喺賽道嘅可觀性,以及公眾交通便利上取個平衡。當日,有好多選手都話比賽沿途可以飽覽香港美景,青馬大橋同昂船洲大橋景色就最正;而新增的尖山隧道有長命暗斜,考驗選手爬坡耐力,具有一定挑戰性。

  吸取去年經驗,大會今年作出了多項改善,好似調整咗五十公里同三十公里組嘅出發時間,以避免出現兩組爭路。大會亦於沿路設置更多指示牌,並加派工作人員在窄路調頭位置提醒參加者減速,希望加強保障參加者的安全。今次賽事順利舉行,亦有賴參與車手的專業表現及配合。我們會因應參與人士、合作機構等的意見,持續改進,希望令單車節成為香港主要的體育盛事之一。

  另外,我想同大家分享嘅係,今年有一些視障或聽障人士挑戰五十公里組項目。佢哋兩人一隊,聽障者坐前方負責帶路,視障者坐後座主力畀力踩。為咗今次活動,我知道佢哋相當勤力,每個星期都出動練車,仲話希望累積經驗出戰台灣環島單車賽,絕對係精神可嘉!

  今次單車節成功為「動感十月」系列活動打響頭炮。下個月香港仲會舉辦網球公開賽、三項鐵人賽、渡海泳、電動方程式賽車錦標賽等多項體育盛事,希望可以再次掀起運動熱潮,為香港吸引更多旅客,鞏固「盛事之都」的地位。更希望藉大型活動漸趨成熟,幫助旅遊業發展。

林建岳博士




hd