香港美事——環保綠色酒店

  經過近四個月試業,香港海洋公園萬豪酒店今個星期正式開幕。啱啱星期二元宵節晚上,我哋舉行咗盛大開幕酒會,好高興得到行政長官、中聯辦副主任、同埋外交部副特派員,仲有一眾政商界、演藝界以及傳媒朋友支持,一齊嚟join我哋嘅開幕酒會。

  海洋公園一直致力保育大自然,我哋酒店設計都係以海洋為主題,步入大堂首先會見到一個十六米高、垂直跨越三層樓嘅圓柱形水族館;水族館養殖咗人工珊瑚礁,o依家正在逐步放置不同魚類,令人有一種猶如置身於海洋世界嘅感覺。

  除此之外,酒店仲有兩大特色:第一係酒店設有一個全港島最大嘅一千二百平方米無柱式酒店宴會廳,適合舉辦各種大型酒會、會議同埋喜宴。香港係享譽國際嘅盛事之都,大事、喜事特別多,中央啱啱公佈咗大灣區發展綱要,噚日嘅宣講會都喺度舉行。我哋希望喺大家嘅支持下,將海洋公園萬豪酒店嘅宴會廳打造成「盛事之廳」、「喜事之廳」。

  另一個係綠色環保。酒店不但係建築上採用環保物料,裝設雨水循環系統;而且嚴格按照世界自然基金會嘅標準,選用可持續發展嘅海產食材,讓旅客喺享受佳餚之餘,亦也可以為環保出一分力。支持環保係大潮流,希望藉著海洋公園嘅優勢,將酒店打造成「環保酒店」、「綠色酒店」。

  海洋公園不但滿載着港人嘅快樂回憶,更享有全球最佳主題公園嘅美譽;萬豪酒店品牌往績超卓,係全球具有領導地位嘅酒店管理集團,我哋好高興可以「強強聯手」,希望為海洋公園和南區增添活力,為市民同訪港旅客提供更加精采和多元化嘅旅遊度假體驗。隨著跨境基建相繼落成開通,粵港澳大灣區建設全面推進,相信香港嘅旅遊業及酒店業前景一定更加廣闊。

林建岳博士

hd