香港美事——輕鬆遊歷西班牙

  同好多香港人一樣,我好鍾意去旅行。平時返工十分忙碌,而且六月開始會投入新的公職服務,趁五月尾有點時間,去咗西班牙遊歷一下。

  一到埗去咗一間我覺得實至名歸嘅三星餐廳Restaurante Dani Garcia﹕食材、排場、服務、美酒都值三星。餐廳主廚兼老闆Dani Garcia二十五歲就獲一粒星,成為西班牙最年輕星級廚師,努力加天份,去年喺Marbella嘅餐廳就榮獲三星榮譽。戲劇性地,摘星二十二日後Dani Garcia突然宣佈餐廳今年十月關門大吉,事關佢要新挑戰,追夢想,希望Andalusian菜更普及;佢之後就唔做fine dining,改試年輕路線新派輕食。今次算係趕得切試吓佢功夫。

  唔少時候,高手都在民間。去到Malaga,朋友介紹咗一間餐廳叫Marisqueria El Cateto,外表係一間平凡街坊店,真身係本地廚師私竇、食家宴請老友嘅好地方。食材新鮮,小炒出色。當我身處呢個猶如「Malaga鯉魚門」嘅地方,真係好似武俠片咁,市井小巷,都往往有個高手。之後喺Marbella old town巷仔,都揾到間一星餐廳Skina晚飯;地方好細,廚師年輕,本地食材,得十二個位,食落有驚喜。

  旅程有精采嘅菜式,都要有好夥伴一齊分享。今次遊船旅程中有兩日天氣變差,開唔到船滯留碼頭。好在船上嘅同行友人大顯身手,廚神上身。轉瞬間以番茄龍蝦湯展開序幕,冷盤炸物火腿甜品一路精采,比得上三星名廚。

  到咗最後一站Barcelona,揀咗間星級廚推介嘅餐廳「Pur」,係「pure」咁解,標榜簡單烹調食原味,通常只有用料靚至夠膽咁賣。事實上Pur真係做得唔錯,除咗海鮮之外,又點咗西班牙腸charcoal grilled、仲有蔬菜、魚鮮、肉香、菜香共冶一爐。

  臨走前朝早,去咗Barcelona最大嘅market「La Boqueria food market」掃街買手信,實在太多嘢買。不過,最吸引都係四十八個月jamon火腿,即切即試,試到滿意至捧走。遊歷過後,離開Barcelona直飛北京,繼續努力的旅途。

林建岳博士


hd