陸羽仁周記——炒放水中資股高半線

        港美股市同步造好,藉中美貿易談判有突破,美股上周五大升收市。一月升市效應再現,炒上其實唔使講咁多理由。

  上星期三、四線內房股佳源國際(2768)勁插八成,引起市場嘩然。大跌原因係對公司債務到期引起敏感反應,其後公司公佈到期票據已還款,集團分別喺2018年1月19日同4月26日發行,共值3.5億美元,票息8.125厘的優先票據,確認已全數償還,股價隨即出現反彈。有中環茶友話若然夠膽低撈,短炒可以執一筆。

反應慢不等於無反應

  類以佳源呢類例子,夠膽吼準低位入貨,的確可賺大錢,不過投資增值,唔一定需要賺快錢,睇準大勢作中長期部署,一樣可以有理想回報。早前陸羽仁講同內地富豪分享投資之道,茶友都好有興趣。富豪難忘喺2009年金融海嘯時,唔少內房股大跌,當時買入好容易都翻幾番,承受風險亦唔算好大。

  按照富豪嘅投資哲學,最好係落注作風進取、但現金流做得好嘅公司,喺高增長環境就可以食盡升浪。以現時環境而言,去年美國經濟強,中國經濟弱,形成人民幣有匯價壓力,阿爺好難放水。最新形勢係美國數據仍然強勁,美國利息雖然暫時唔會加,但亦睇唔到短期調低空間。

  相反,中央年頭開始,不斷加大救市力度,繼上星期降準後,再大力放水入銀行體系,形成內地股市資金開始增加。雖然市場初期對泵水反應唔大,但反應慢唔等於冇反應。隨住效應慢慢發揮,資金應該會令資產市場升溫,唔排除因此吸引資金重新流入中港股市,成為今年投資環境新境況,即係話內地股市同中資概念股可能可以睇高半線。

中小企搶食難敵大企

  有分析員話中央放水,主要希望救活中小企,睇唔到對股市有咩推動力。不過,資金流向好多時唔完全受政府控制。中小企本身競爭力冇大企業咁強,雖然放水係想益中小企,但最後資金可能仍然落喺強者手上。正如喺動物園,管理員想餵小動物,但食物一拋入籠,好難避免俾獅子老虎搶食。

  所以中央放水想益中小企,但有實力嘅上市巨企,點都會有啲優勢。同樣,就算中央唔直接放鬆樓市,內房資金供應都會改善。好似佳明大跌呢啲例子,本來係市場擔心民企債務危機。若然中央唔鬆手,估計會陸續有民企出事,但O依家阿爺開始救市,局面有機會逐漸喘穩。

  O依家嘅龍頭內房,唔少都積累咗風險防控嘅經驗。富豪話,好似碧桂園(2007)手頭項目雖然多,但公司特色係周轉快,由攞項目到賣樓只需要半年左右,而且內地賣樓同香港賣樓唔同。香港賣樓後,交樓前樓款要放喺獨立第三者戶口,內地就可以即時取用,所以只要賣到樓,現金流就冇問題。所以大隻同上市時間較長嘅內房,好似世茂房地產(813)同富力(2777)等境況都會紓緩。

內航股炒農曆年效應

  喺中央大力放水下,恒指上周五收報27090點,近個半月來首次喺27000點以上收市;國企指數收報10636點,全周累升423點。

  中美貿易方面,中國商務部新聞發言人話,應努欽同美國貿易代表萊特希澤邀請,國務院副總理劉鶴將於本月30日至31日訪美,就中美經貿問題進行磋商。加上彭博報道指,中國提出由今年起至2024年的六年內,合共向美國額外進口超過一萬億美元貨品,令美國對華貿易赤字由去年嘅3230億美元,到2024年降至零。

  消息令美股頗為興奮。杜指收升336點,報24,706點。全周升3%。標普500指數收升34點,報2670點。全周升2.9%。納指收升72點,報7157點。全周升2.7%。市場關注電動車特斯拉(Tesla)公佈裁減約3000名員工,股價急插13%,為近四個月最大單日跌幅,市值跌至519億美元,低於通用汽車的544億美元。

  一月開局至今,升市成為主調,如今累積相當升幅,從中線角度睇可以繼續持有,短炒就要留意反覆。由於農曆年接近,好快又係出遊日子,加上呢排人民幣匯價硬淨,對航空股有利。內地三大航空股國航(753)、南航(1055)、東航(670)表現唔錯,短期有炒作機會。

農曆年名人團有需求

        農曆年將至,唔少人都會外遊,除咗傳統報團同自由行,近年又興起報名人團去玩。呢啲名人旅行團帶隊,最早當然要數美食家蔡瀾。近年電視主持人杜如風嘅日本團索價八萬元,亦屬於貴價團佼佼者。仲有庶民美食家梁家權嘅歐洲團,近年人氣都幾勁吓。

  最近,另一個人氣領隊係同香港開電視合作嘅項明生(James)。佢主持嘅文化旅遊節目《明治憑甚麼》播出後有一定口碑。佢亦乘勢開團到日本京都。James身材瘦削,外形唔似食家,佢帶隊嘅團都唔用飲食作招徠,改行文化路線,帶團風格亦一樣。京都團每位團費據報近三萬元,比自由行明顯貴一截,所以主打中高檔客。

  若然話高消費,佢有個15日嘅歐洲郵輪之旅,15日收10萬元左右。呢個歐洲團乘客航班同酒店都經過精挑細選,同時仲會乘坐最豪華嘅河船。花得起呢個價錢,肯定都講究生活享受,所以喺文化以外,飲食享受都要做到足。

陸羽仁

hd