陸羽仁周記——租賃股似個好丈夫

        港股豬年首個交易日紅盤低收,恒指收報27946點,跌43點,全周兩個交易日仍升15點,係連續第六周上升。國指收報10956點,跌79點,一周累跌107點。上周五杜指一度跌286點,午後白宮宣佈派遣貿易談判團赴華,令美股跌幅收窄,杜瓊斯工業平均指數收跌63點,報25106點;標普500指數收升1點,報2707點;納斯達克指數收升9點,報7298點。一周計,標普500指數累升0.1%,杜指累升0.2%,納指累升0.5%,杜指同納指已經係連續第七周上升。

豬年報捷股傾向穩陣

  美國總統特朗普同國家主席習近平喺貿談「死線」前唔見面,令市場氣氛稍為降溫,但調整幅度比預期細,主要係國際金融股表現不俗。豬年報捷股有友邦(1299),集團上周公佈獲批於天津和河北省石家莊籌建營銷服務部,股價逆市上揚,收報74.05元,升2.2%,更一度升至74.35元,創八個月高位;煤氣(003)逆市造好,以全日高位17.34元收市,升幅1.5%,創歷年新高;中電(002)亦升1.6%,報91.9元;長建(1038)升0.7%,報63.3元。從強勢股類別睇,市場雖然預期資金供應轉鬆,但認為商業環境不明朗,資金主要流入有穩定收入嘅公司。

  近年每逢大時大節,港人都空群外出。O依家大部份企業實施五天工作制,只要有稍長假期,好容易就湊夠幾日有足夠時間外遊。由於外遊成風,中環茶友就討論當中有冇商機呢?

  外遊普及化,O依家就算係基層都話去遊埠,莘莘學子家中唔使好有錢,學校都會提供機會去遊學。從遊埠普及化搵投資機會,好多人直接諗起旅行社同航空公司。旅行社近年競爭激烈,加上自由行興起,生意冇以前咁易做,雖然旅遊社開拓咗深度遊,但呢個行業門檻唔算太高,要做大做強唔容易,能夠上市已經唔容易,想做到年年有增長具備長線投資價值,暫時仲未見到。

板塊細易受忽略

  航空公司情況比旅行社好啲,主要係呢個行業門檻高,但由於好多航空公司有國營背景,所以鬥得幾厲害,幾隻航空股好似東航(670)、南航(1055)同國泰(283)都宜高沽低買。咁仲有冇其他外遊概念股可以留意呢?有中環茶友話,若然唔嫌沉悶,可以考慮飛機租賃股。O依家好多航空公司都傾向融資買飛機,租賃之所以有得做,只要航空公司不斷擴大機隊,理論上租賃公司就唔憂做。由於租賃業務等同收息,所以對息口敏感,投資者會將呢類公司同定息比較,若然利率向上,這類公司吸引力就跌,相反就會受青睞。

乏想像空間變悶股

  茶友話,O依家租賃股主要有兩隻,一隻係中銀航空租賃(2588)、另一隻係中國飛機租賃(1848)。中國飛機租賃喺2014年上市,初期表現不俗,但自從2016年6月中銀航空租賃上市,呢隻股就有啲失寵冇運行嘅感覺,主要係中銀租賃股東背景強勁,市場質素更佳,令中國飛機租賃有點二奶感覺。至於中銀租賃上市,初期表現一般,主要係遇上利率向上周期,影響市場對公司興趣。同時,公司喺推廣同知名度上未做工夫。整體而言,呢個板塊公司唔多,容易受到市場忽略,由於大婆都麻麻,二奶自然無得威。

  最近半年,資金開始追逐有穩定收入嘅公司,中銀租賃走勢明顯見改善,股價拾級而上,中國租賃股價都開始水漲船高。O依家中銀租賃市盈率接近10倍,息率3.5厘;中國飛機租賃市盈率8.3倍,息率有6.7厘。目前公司自有及管理機隊有關511架,飛機使用率近99.9%。目前公司擁有及管理133架飛機,年初再訂購咗25架波音飛機。茶友笑言,呢類股份好處係發展容易了解,壞處就係缺乏想像空間,好似日日放工就返歸,只識按時畀家用但缺乏情趣嘅丈夫,較為適合唔怕悶嘅投資者。

世茂大手筆贊助煙花有啟示?

  每逢年初二維港都有煙花匯演,有中環茶友都有出席。今年活動係「世茂集團呈獻」,茶友留意到,世茂(813)近期股價走勢不弱,公司咁大手筆,莫非真係業績好得?

  今次煙花匯演安排傍晚先食豐富自助餐同欣賞醒獅表演,八點係壓軸煙花。獲邀出席者除咗特首、政務司司長、中聯辦官員、外交部駐港特派員、解放軍代表等政要同往來銀行,當然仲有公司大員。

  今年煙花共分八幕,仲有一幕《When I Fall In Love》,用瀑布煙花營造浪漫氣氛,配合即嚟臨嘅情人節。春節煙花投入嘅贊助費用近1000萬元,比起入場版5、600萬元要豪得多。

  除咗世茂主席,當晚主家席仲有建滔集團(148)嘅主席張國榮。建滔屬於工業股,去年受中美貿易談判影響,由高位回調近五成,最近大市反彈,建滔股價都由低位回升不少,春節後首個交易日更逆市造好,可能係沾到煙花旺氣都未定。

陸羽仁


hd