88金管——信用卡付款嘅學問

阿四:我去開嗰間美容院推出套票優惠,買得愈多折扣愈大,仲可以用信用卡分期付款,好着數!

小森:着數還着數,有冇諗過萬一美容院倒閉,你分期付款啲錢會點?

阿四:我都冇得做埋剩返嘅療程,梗係唔使還啦!

小森:錯!用信用卡分期付款其實係你同發卡銀行借錢,先由銀行找晒筆數畀美容院,然後你再分期還畀銀行。所以就算優惠有幾吸引,簽分期付款合約前都要睇清楚條款,當中都提醒萬一商戶執笠,你都有責任繼續還款,唔好急住簽單而睇漏。

阿四:如果我用信用卡簽帳直接一筆過畀錢美容院,係咪執笠時而我又未用完美容療程,就有信用卡退款保障?

小森:基本上可以,但要睇吓你張卡所屬信用卡組織嘅條款,包括退款保障嘅期限。如果好耐之前嘅簽帳,可能申請唔到退款。

阿四:原來唔係一定有得退返晒錢!

小森:所以你一筆過畀錢前,最好諗清楚自己係咪退款保障限期內用得晒所有療程。畀錢後記得保留返交易記錄如收據同商戶簽訂嘅合約,以備申請退款時遞交。想知多啲,睇吓金管局同埋發卡銀行嘅網頁,或者直接問下銀行!

阿四:如果我唔係分期付款,又唔係一筆過畀錢,只係同商戶簽約,每個月用信用卡自動轉帳畀錢,佢執笠時又點算?

小森:商戶執笠後應該唔會繼續轉帳,但最好留意下一期信用卡月結單,如果發現有相關嘅帳項,你可以聯絡發卡銀行幫忙安排盡快退款。

阿四:原來信用卡過數都有咁多學問,真係長知識!

想問多啲有關金管局工作,歡迎電郵到小森、阿四專用郵箱:88hkma@hkma.gov.hk

小森和阿四

hd