88金管——保障市民的銀行處置機制

阿四:金管局最近成立咗處置機制辦公室,查實「處置」係乜東東?

小森:二○○八年全球金融危機時,各地政府擔心金融機構倒閉會波及整個金融體系,於是動用天文數字嘅公帑拯救「大得不能倒」金融機構,呢種「佢請客,我埋單」嘅做法引起社會各界非議。國際間於是制定咗處置機制,避免再用公帑幫呢啲金融機構填氹。

阿四:唔用公帑嘅錢,咁用邊個嘅錢?

小森:處置機制其中一樣措施,就係要銀行做定準備,將來一旦出事時要自己填氹,由銀行股東同埋債權人承擔返倒閉嘅虧損。

阿四:聽落係公平過用公帑,但似乎唔關我呢啲小市民事!

小森:好有切身關係就真。你有銀行戶口㗎?

阿四:梗係有。

小森:未有處置機制前,銀行倒閉就要清盤。一清盤嘅話,銀行客戶提款、轉帳呢啲基本銀行服務就統統無得用。不過有咗處置機制後,畀咗金管局權力幫銀行善後,一發現銀行要倒閉,金管局可以火速介入,確保銀行服務唔會中斷。想深入啲知道處置機制係乜,可以睇下陳總噚日發表嘅《匯思》文章。http︰//www.hkma.gov.hk/chi/key-information/insight/

想問多啲有關金管局工作,歡迎電郵到小森、阿四專用郵箱:88hkma@hkma.gov.hk

小森和阿四

hd