88金管——開放API

阿四:「小森,金管局噚日發出開放API業界諮詢文件,其實開放API係乜嚟?」

小森:「API全名係Application Programming Interface,中文叫「應用程式介面」,負責做中間聯繫人,喺唔同服務供應商及程式之間傳遞資料同指令。開放API係指一間機構對外開放自己系統嘅資料或功能,畀其他服務供應商或程式使用。有啲服務供應商仲會連接多間機構嘅API,整合推出全新服務或產品。」

阿四:「都係唔明喎。」

小森:「服務供應商就好似代購網站,會連接去多個購物平台幫用家「代客購物」。呢啲購物平台可能喺唔同地區用唔同語言、支付方法,但代購網站就利用呢啲購物平台嘅開放API連結多個購物平台一齊,為用戶由選購、付款以至運送嘅一條龍服務。服務供應商仲可以從客戶購物習慣提供更多增值服務,例如提醒客戶用邊張信用卡買嘢有折扣等等!」

阿四:「我明啦!咁有冇開放API嘅實際例子?」

小森:「好多酒店、餐廳網頁會連結Google Map嘅開放API顯示自己嘅位置。」

阿四:「點應用喺銀行服務方面呢?」

小森:「例如現時一啲銀行貸款或信用卡嘅格價app,仍然用傳統方式收集數據,資料更新慢啲,多數唔可以將多間銀行資料結合。日後銀行推出開放API後,呢啲app可即時喺唔同銀行攞到最新資訊,再發放畀用戶,同時可即時申請有關服務。金管局出諮詢文件係希望透過向業界收集意見,就幾時、點樣、同埋開放API應用喺邊啲服務,設立框架。文件按風險程度,將開放API應用劃分為四個範疇,包括銀行嘅公開資訊(如產品同服務資料)、產品申請(如信用卡、旅遊保險等)、客戶嘅帳戶資訊同交易紀錄,以及使用帳戶進行交易。」

阿四:「嘩,咁我嘅私隱可以點受到保障?」

小森:「放心,涉及客戶資料嘅開放API,事前一定要獲得客戶同意先可以使用,業界亦要跟從所有保安守則!」

想問多啲有關金管局工作,歡迎電郵到小森、阿四專用郵箱:88hkma@hkma.gov.hk

小森和阿四

hd