88金管——終身年金出台!

阿四:期待已久嘅香港終身年金計劃終於嚟啦,但我被我爸爸問到口啞啞!

小森:世伯問咗乜咁難答?

阿四:佢聽人講,年金計劃唔可以對沖通脹!皆因年金每月定額「出糧」,今日收五千蚊、十年後又係收五千蚊。仲有專家話買股收息、買樓收租嘅回報仲好過買年金。

小森:年金係保險產品,用嚟緩解「長壽」風險,而買股買樓係投資,性質不同。買年金嘅好處係由你投保嗰日就清楚每個月有幾錢保證落袋,直至百年歸老。相反,上市公司唔一定年年派息,物業亦唔擔保租得出。而且兩者價格可升亦可跌,收息收租都無寫包單追到通脹。講到底,最重要係了解自己退休後嘅理財需要。

阿四:我爸爸又話,六十五歲男士買年金要十年先回本,即係話頭十年累積收取嘅年金加埋保單嘅保證現金價值就會同本金打和,之後收嘅年金先算係「回報」。佢又聽人講話做定期更好,假設活期息二點一五厘,利疊利十五年後,回報比年金更可觀!

小森:我解畀你聽:假如世伯有一百萬元,用返你講嘅息口,而每月支出五千八百,世伯喺十七年後即八十二歲就會用晒呢筆錢,坐食山崩;而終身年金喺十五年後累收總回報一百零五萬元(105%),但最最最重要係世伯無論活到幾多歲,每個月保證收五千八百, 一個仙都唔會少!不過有一點必須注意,終身年金要一筆過投保,中途退保同其他保險產品一樣會有損失,所以,一定要注意流動性,以備不時之需。

阿四:有啲複雜,我都唔識計畀爸爸睇。

小森:香港年金公司網站www.hkmca.hk都準備咗年金計算機,上去撳下就清楚。話時話,如果世伯投資真係好叻或者完全唔擔心「長壽風險」,終身年金未必啱佢㗎!

註:現時主要零售銀行活期息率介乎0.001%至0.02%

想問多啲有關金管局工作,歡迎電郵到小森、阿四專用郵箱:88hkma@hkma.gov.hk

小森和阿四

hd