88金管——銀行資金時刻暢通嘅幕後功臣──RTGS

阿四:人體血管將養份輸送到身體各部位,咁你知唔知銀行體系點樣輸送資金?

小森:我估你講緊啱啱開會提到嗰個RTGS,佢全名係Real Time Gross Settlement,即時支付結算系統,係香港金融基建最重要骨幹。金管局喺一九九六年推出港元RTGS,畀銀行業一個高效、安全、簡便嘅平台進行同業之間嘅支付結算。除咗銀行之間嘅大額支付項目外,RTGS仲會處理同我哋日常生活相關嘅支付,例如支票、股票買賣、自動櫃員機轉帳等嘅資金往來。你日日用緊唔多覺,但無咗佢就好大件事!

阿四:RTGS咪好忙?

小森:現時RTGS平均每日交易金額大約九千二百億元,仲多過香港二○一七年第四季GDP(約七千二百億元)。二○一七年全年港元RTGS成交額大約二百六十萬億元,差唔多係全年GDP嘅一百三十倍。

阿四:原來RTGS幫香港處理咁多錢銀交收!

小森:呢個系統等如銀行血脈,如果唔暢順,輕則增加銀行嘅流動資金壓力,造成利率飆升,嚴重嘅話甚至令銀行停止運作。慶幸嘅係,RTGS運作廿幾年嚟,由港元開始,之後支持埋美元、歐羅同人民幣,都一直「零意外」,為香港嘅金融穩定默默作出貢獻。

阿四:哦,我終於明白點解頭先開會講RTGS!因為下星期公佈推出嘅「快速支付系統」就係RTGS嘅加強版,會打通電子錢包、銀行戶口之間嘅阻隔,以後市民只需要一個電話號碼或電郵地址,就可以透過「快速支付系統」即時收到轉帳款項。

小森:以你轉數嚟講,都理解得好快,下星期我哋再講多啲呢個系統有幾勁。

  想問多啲有關金管局工作,歡迎電郵到小森、阿四專用郵箱:88hkma@hkma.gov.hk

小森和阿四

hd