新‧潮——生活在政治之外

  過去一周當媒體報道及時政節目,集中討論及分析林鄭特首今年《施政報告》各項新猷。相關官員不停忙穿梭,不斷解畫。估唔到,網上一個討論區,最熱門話題之一,竟然唔係關心首置上車盤,點攞盡三百蚊交通津貼;而係熱烈討論:如何煮好一碗即食麵?冇錯,不少網民好投入研究,應該係冷水,抑或滾水落麵?那小包麻油應該幾時落?味粉應否事先另用熱水稀釋?煮麵後剩下來,稠稠白色的麵水,當中是臘、是油、還是甚麼對人體有害物質?吃下肚會否有害?

  民以食為天。本周個人除了關心《施政報告》,有另一個趣味課題,亦同食有關係。不過唔係研究即食麵,而係研究點樣煎好一件牛扒。靚扒愈來愈貴,整得唔好,食係浪費生命,唔食係浪費食物。傳統嘅煮法:牛扒每面先煎封約兩分鐘(視乎大小及重量),防止肉汁流出,然後再用焗爐焗四至五分鐘。再等三至五分鐘,待件扒穩定落嚟。但網上有另一煮法,反其道而行,先用焗爐焗四至五分鐘,後用煎封方法鎖住肉汁,再等四至五分鐘。試行之後,發覺後者效果明顯較佳,半生熟程度較易掌控。

  連烹調牛扒方法都有南轅北轍兩個做法,香港政治多有爭拗,預咗喇。

楊振耀

hd