商界講呢啲——破天荒 傷健共融音樂會

  小妺有時都會陪honey聽一下歌去一下音樂會,點知最近佢話有個音樂會點都要小妹幫佢訂飛!原來佢講嘅就係由香港二胡藝術中心主辦嘅「心路隨想音樂會」,小妹都覺十分難得,事關音樂會係由二胡同鋼琴中西合壁演奏之外,當晚嘅演奏家更加係破天荒合作,兼且仲係為香港盲人輔導籌款慈善演出,係咪難得呢!

感受每首曲之小故事

  「心路隨想音樂會」係由二胡演奏家兼作曲家王憓,聯同患嚴重視力障礙嘅鋼琴家李軒、李昇兩兄弟,破天荒首次合作,齊齊以音樂展現人生嘅曲折離奇、變幻萬千。小妹同王憓傾過,佢希望藉住呢次演出,將青年一代嘅奮鬥精神同埋內在嘅正能量發揮出來,加以鼓勵同表揚。而今次演出嘅作品大多數係王憓嘅創作,以二胡獨奏、鋼琴伴奏及鋼琴獨奏嘅形式演出,仲有精心挑選不同時期所創作嘅樂曲,而每一首曲都有一個故事,每個故事透過二條弦線演繹令你去感受,意會當中嘅曲中語,去欣賞每首曲嘅故事。

  仲有呀,今次音樂會除咗會演奏《為了愛》、《感情的四季》等音樂作品,仲有李軒嘅自彈自唱自己創作嘅作品;而且王憓仲特別為音樂會創作了主題曲,並且喺音樂會首次公演,大家係咪好期待呢?

  小妹提一下大家,音樂會喺2019年4月20日(星期六)晚上7:30、香港大會堂音樂廳舉行。機會難逢,只演一場。

Cally


hd