商界講呢啲——Panasonic泛亞韻律泳錦標賽 香港隊攞到12金 好感動呀!

  啱啱呢個周末,Cally去咗九龍公園游泳池(跳水池)睇韻律泳比賽。小妹一向覺得韻律泳好好睇,選手體態優美、服飾又靚,仲要好齊心團結咁做到超高難度動作,marvellous!最正嘅係今次比賽由Panasonic冠名贊助,市民可以免費入場睇,喺現場有觀眾嘅打氣聲、有強勁嘅音樂節拍,真係零舍好睇呀!

  呢個「Panasonic泛亞韻律泳錦標賽暨第十五屆香港韻律泳公開賽2019」喺8月30日至9月1日舉行。有超過150位運動員,分別嚟自中國、印尼、馬來西亞同香港,共11隊參賽隊伍。大會設立咗8個比賽項目,分別為單人自由自選項目比賽、單人技術自選項目比賽、規定動作比賽、雙人自由自選項目比賽、雙人技術自選項目比賽、集體自由自選項目比賽、自由組合項目比賽及游進項目比賽。

為港人爭光

  比賽中,選手們個個施展渾身解數,喺水裏面做出各種托舉、旋轉、彎曲等高難度而且優雅嘅動作,真係精采到拍爛手掌!喺三日嘅國際賽事裏面,香港隊仲攞到好好嘅成績,共有12金、4銀、1銅,17面獎牌。喺公開組集體自由自選及自由組合項目中,香港隊仲喺競爭激烈嘅情況下攞到金牌,個場面真係好熱血,好感人呀!

Cally

hd