企業熱話——風險管理不可或缺

  仲有幾個月,各位準大學畢業生就踏入職場做「新鮮人」。商科作為最受歡迎嘅科目,加上金融業又係香港四大支柱之一,好多人都諗住入銀行業大展拳腳,反而保險業就少啲人考慮。咪以為保險業只有前線agent?其實仲有好多中後勤嘅職位。事實上保險業係金融業中嘅重要一環,佔咗本港GDP嘅3.7%。單計2017年,毛保費總額接近4,900億港元,按年增長8.3%。而家本港約有160家保險公司和約十萬名保險從業員推動經濟發展及就業。

  講到保險,其實係一門管理風險嘅學問,同日常生活息息相關!就好似大家經常會到嘅地方,例如機場、商場、交通工具、著名地標等都有買保險。一旦不幸遇到咩天災人禍,索償額可能係天文數字,保險喺呢個時候就發揮作用,提供支援、減低損失。計小弟話,而家人口老化問題愈嚟愈嚴重,推算到2036年長者佔咗三成人口,高達237萬。社會除咗生產力會逐漸下降外,公營醫療系統亦不勝負荷。老套啲講句真係要「未雨綢繆」,趁後生時買定醫療保險,到有病痛時就可以發揮作用。

  保險嘅風險管理功能喺現今社會係不可或缺。呢行除咗較少受經濟週期影響外,中後勤專業崗位亦係經常缺人,需要大量新血加入推動發展。小弟會由今期起一連十二個星期,逢星期二喺度介紹保險業嘅多元化工種及險種,有興趣入行嘅朋友,密切留意喇!

Jacky哥

hd