企業熱話——保險業鬧「人才荒」

  講起做保險,咪以為只有「sales」同「跑數」?其實背後仲有好多中後勤崗位支援行業運作,先至可以做到香港保險業咁蓬勃,好似海事保險專才、精算師、再保險專才、風險管理師等。小弟近排行過中環港鐵站,有個「保–以人為本」系列燈箱廣告,介紹一班現職保險業嘅中後勤專才,等大家知多啲鮮為人知嘅保險業崗位。

  其實保險業中後勤專業崗位經常缺人,部分業內前輩到咗退休年齡都無得走,青黃不接情況好嚴重。年青一代如果加入保險業嘅中後勤崗位,都真係好有前景!部分仲係好專業,好似海事保險專才負責協助制訂航運保險產品、管理承保同索賠個案;精算師負責設計保險產品、為公司計算要準備幾多錢做賠償金;再保險專才負責幫助保險公司管理業務、分散風險;核保師負責審視投保人嘅狀況作批核決定;理賠師負責處理索償申請同為客戶提供風險管理嘅建議。其實後勤仲有好多其他崗位,例如保險科技專才、保單處理行政人員等,有興趣可以去www.instalent.org.hk網頁睇吓。

  講到前景,等小弟引用一下職業訓練局保險業訓練委員會嘅《保險業2017年人力調查報告》資料,2015至2017年,保險業從業員數目均錄得逾40%增長。報告同時指出2019年一般保險空缺達二萬人,加上粵港澳大灣區及「一帶一路」嘅發展機會,專屬自保保險、再保險、海事保險方面嘅業務未來都大有可為!提一下大家,小弟會在下星期繼續同讀者介紹行業發展,不容錯過!

Jacky哥

hd