企業熱話——一個「大腦」的誕生

  過完年出完Bonus、雙糧,又係轉工跳槽嘅旺季,計小弟話其實只要成為一個有前景行業嘅專業人士,又使咩年年諗。好似保險業嘅精算師同核保師,都稱得上係保險公司嘅「左右腦」,點計都係專業人士啦!

  尤其係當外圍環境唔穩定,相對風險亦增加嘅時候,身為保險公司「大腦」嘅精算師,會負責預測未來可能會發生嘅風險,再設計可靠兼可長遠發展嘅保險產品,等投保人可以用合理嘅價錢嚟轉移風險。另一方面,精算師亦要為公司制定賠償準備金同其他財務方案,一旦風浪「殺到埋身」,保險公司亦有穩健嘅財力應付挑戰,好似2008年嘅金融海嘯咁,保險公司就因為有充足儲備,平穩渡過呢場風暴。

  咪以為大件事才需要核保師,小弟知道佢哋接觸嘅客戶層面好廣泛,大至起摩天大廈、隧道大橋,小至保障個人同家庭都有!其實投保人交咗份保單申請表之後,都會經核保師全面檢視,客觀分析客戶資料,再評估風險,最後決定保單收費同條款。不過另一方面,佢哋亦有責任確保公司可承受到相關風險。

  社會發展咁急促,預視到嘅風險亦愈嚟愈多!保險業仍然有好大嘅發展空間,亦好需要人才投身呢個行業。核保師同精算師嘅入行門檻係大學畢業,精算師更要考取專業資格!至於仲讀緊書嘅同學,可以考慮吓參加由政府資助嘅保險業暑期實習計劃,親身了解吓呢行嘅工作!截止報名日期係3月29日,快啲去報名啦!詳情請瀏覽:https://www.instalent.org.hk/tc/content/sip

Jacky哥


hd