企業熱話——仁愛堂幫香港人 面對精神壓力

  近排真係好多春茗,上星期小弟去咗仁愛堂春茗,除咗見到羅台秦主席同埋仁愛堂董事局成員、諮議局委員、歷屆總理之外,科大校長史維教授、陳百里副局長、蔡若蓮副局長、前局長吳克儉、謝凌潔貞常任秘書長、伍秀慧助理署長、中聯辦楊流昌部長、台經辦高銘村代理處長等嘉賓都有出席。

  羅主席席間仲話過去一年,仁愛堂推行咗一啲創新嘅服務,當中包括特別成立嘅「仁愛堂羅台秦關愛基金(精神健康)」,開展全面精神健康支援服務,而且仲會透過協調仁愛堂內醫療、社服、教育、康體四個主要服務部門嘅資源,創建一個跨科部嘅合作支援平台,務求喺協同效應下,為有情緒問題嘅弱勢社群提供心理、生理、社交、康樂、到戶照顧以至臨時護理等支援服務。

  另外,佢亦感謝各個團體支持今年度各個籌款活動,連同全年贊助人、董事局同外間嘅捐獻,合共籌得港幣七千萬,得到咁嘅成績,真係令人十分鼓舞!對於展望未來,佢話會繼續以「滔滔清泉‧潤澤社群」為目標,惠澤更多弱勢社群,締造充滿「仁」及「愛」嘅香港!

Jacky哥


hd