企業熱話——港海上保險地區中心 「一帶一路」顯優勢

  早排同啲保險業界前輩飲茶,佢哋問起我有冇啲年輕人可以介紹入行做水險。水險?咁專?傾落先知呢個保險工種係專做海事保險,起源於英國,算係保險業其中一種發展最悠久嘅險種。一般嚟講可以分為兩類:一係船舶保險,即係船體同機械設施嘅保險;另一類係貨物保險,保障運輸過程中貨物嘅損失。

  呢行發展同國策有緊密關係,一嚟香港喺國際貿易同海事保險有傳統優勢,二嚟係「一帶一路」嘅發展,亞投行至今批咗30多個項目,大型基建工程唔只可以促進沿線國家經濟發展,唔少內地企業亦乘勢「走出去」拓展業務,當佢哋要運送一些特殊或高風險嘅機器時,就為本港保險業提供龐大嘅商機。小弟知道業界經已磨拳擦掌,好似保監局舊年年底成立「一帶一路」保險交流促進平台,匯聚行內精英,為基建項目提供完善、專業嘅保險同再保險方案。

  長久以來,優越地理位置令香港成為區內嘅樞紐港之一,成熟又具規模嘅海上保險服務更顯優勢,預料未來對熟悉海事保險、海事法律嘅人才亦有好大需求!前輩仲話呢行青黃不接嘅情況都好嚴重,多年嚟都唔夠新血入行,搞到老一輩想退落嚟都唔得。計落呢行前景都唔錯,準備畢業嘅同學可以考慮吓投身呢個行業,做夠兩至四年升到主任,月入可以超過三萬!

Jacky哥

hd