企業熱話——保險公司都要買保險

  保險係為咗要減低因風險而引致嘅損失,咁保險公司再買保險呢,其實呢啲叫「再保險」,目的都係將風險轉移同分攤。

  保險公司承保咗大量一手風險後,需要透過向再保險公司購買再保險,將風險再次轉移,目的係做到「保險嘅保險」。即使遇上大型天災人禍,保險公司亦唔會因為巨額賠償而影響營運,再保險公司亦可以提供支援。

  以美國911恐襲事件為例,當年賠償金額高達400億美元(約3千億港元),創下美國史上數一數二最高理賠金額嘅紀錄,當中有三分二就係由再保險公司承擔。睇返香港,前年嘅超強颱風天鴿吹襲本港,索償額近9億。至於舊年個颱風山竹,雖然仲未有完整統計數據,但小弟聽業界前輩講,估計走唔甩要賠十億。試諗吓,如果冇咗再保險公司喺背後幫保險公司承擔風險,保險公司都未必可以承接我哋嘅保險,更加唔好話要健康長遠發展!

  可想而知,再保險嘅工作幾咁重要同有挑戰性,而再保險仲有一個好吸引嘅特點,就係非常國際化。由於再保險公司嘅客戶係位處唔同地區嘅保險公司,所以有唔少機會去海外公幹;即使唔出trip,亦因為再保險嘅專業性質,吸引好多海外專家嚟香港工作,所以日常接觸嘅人與事都非常國際化,最適合有興趣認識同學習新事物嘅年青人加入!業界有個由政府資助嘅暑期實習計劃,當中有唔少再保險職位,大學生不妨趁機了解吓再保險業嘅運作!截止日期係3月29日,詳情請瀏覽:https://www.instalent.org.hk/tc/content/sip

Jacky哥

hd