企業熱話——今時今日 要捉緊Z世代消費模式

  有調查資料顯示,2019年全球最大嘅消費群係Z世代,佔全球人口嘅32%,想盡得呢個市場梗係要多啲了解佢哋!Z世代係泛指1995年至2009年出生嘅一代,同全球25個市場經營12個零售品牌以及超過15,200家店舖嘅屈臣氏集團首席營運總監倪文玲傾開,倪小姐話:「要滿足Z世代,數據分析擔當了相當重要嘅角色,幫到我哋了解顧客嘅需要、喜好及購物習慣,並調整業務策略。」根據集團數據分析顯示,平均有86% Z世代係美容愛好者,而且佢哋支出超過70%係用於購買彩妝護膚產品,較其他年齡層相對最高。另外,佢哋喜歡一邊到實體店購物,一邊用手提電話上網瀏覽其他顧客對產品嘅評價,又或者同朋友透過社交平台分享店舖內嘅購物體驗,又鍾意到大型商場及市中心店舖逛!

  要吸引呢批顧客群,倪小姐話屈臣氏集團旗下遍佈全球嘅業務單位舉辦了一連串推廣活動,滿足當地Z世代顧客嘅要求。喺亞洲,中國屈臣氏為當地學生喺校園搞快閃活動同彩妝課程;台灣屈臣氏開設首家Tech Fun玩美概念店,店內有最新嘅StyleMe虛擬試妝鏡、點點購及電子美容顧問等零售科技設備。喺歐洲,The Perfume Shop推出全新數碼服務Go in Store,結合擴增實境(AR)及人工智能(AI)技術,幫顧客揀香水,提升顧客嘅購物體驗。

  此外,Z世代亦關心可持續發展,所以屈臣氏集團計劃喺今年將自家品牌所有彩妝及個人護理磨砂產品禁止使用塑膠微粒,同時喺各地業務先後採取措施,為顧客提供膠袋替代品,又或以獎勵方式鼓勵顧客不使用膠袋。最後,倪文玲同小弟總結:「Z世代係一個與千禧世代非常唔同嘅顧客群。佢哋追求個人化體驗及活動,同時關注環境保護及樂於回饋社會,為零售業注入活力,創造可持續發展嘅未來。」

Jacky哥


hd