陰功中女 人夫男友呃自己兩年 陳昭昭「被小三」 酒店向妹哭訴

        41歲的陳昭昭早前被指搶人老公兼恐嚇對方老婆陳小姐,強調無做過嘅佢日前約胞妹到銅鑼灣飲下午茶,然後再到石硤尾聖方濟各堂禱告,全程神情哀傷,不時掩面流淚,可見「被小三」事件對佢影響好大。事後致電給她,她表示當日心情好低落,不過隨着男友李志豪(Franky)在報章發聲明表示已婚並向她道歉,現時心情已平復好多,昭昭強調男友雖被指奉女成婚,但已確定該女孩不是他的骨肉。她稱事件太複雜,已交由律師處理。問到同男友仲有無將來?昭昭話,「如果佢搞清關係,我都希望可以同佢喺我領洗嘅教堂行禮。」

採訪:李佩儀、梁志明

早前陳昭昭由胞妹陪同開記者會,她指報道有失實陳述,強調無搶人老公,自己才是最大受害者;同時亦多次收到男友前度女友溫小姐的電話及訊息,遭恐嚇及勒索,因此曾到旺角警署備案。事件發生後,她晚晚以淚洗面。早前見她相約胞妹到銅鑼灣柏寧酒店Coffee Shop飲下午茶,一直悶悶不樂嘅佢望住咖啡發呆,偶然飲幾啖,呆呆吓就開始盡訴心中情,一直講足成粒鐘,講至激動時更會用手掩面掩口、摸額頭再用手抹眼淚。離開酒店後,她駕着自己的Benz房車去到石硤尾。

低頭禱告15分鐘

在黃竹街停車場泊好車後,她偕胞妹步行至附近的教堂聖方濟各堂。內裏人不多,只見她在較後的位置坐下,然後再跪下低頭禱告。她合埋眼唸唸有詞15分鐘,然後便起身向遠處的妹妹打了個眼色,跟住再取車回家。事後致電給她,她直認當日好唔開心好Sad,不過之後男友在報章刊登道歉聲明,表示瞞着家人及女友陳昭昭已婚的身份,她覺得終於還自己一個清白,故現時的心情已平復了好多。

確定男友無女兒

問她是否已原諒男友?她續說:「可以咁講,其實佢有同我解釋,但佢嘅感情事真係好複雜,要花啲時間處理,不過可以好肯定嘅係,個女唔係佢嘅(親生骨肉)。」現時事件已交給律師處理,所以這段時間她與男友都處於冷靜期,問她雙方還有見面嗎?她坦言:「單獨見面真係冇,但因為佢都係教友,返教會時會撞到。」不過她續稱若男友回復單身,又有誠意悔改,她都會畀機會,「我哋拍咗兩年拖,我真係愛佢,我都想同佢喺我領洗嘅教堂行禮,但大前提係佢一定要單身。」由於她明年會推出福音碟,又會投資拍電影,現時都會寄情工作,感情事先放埋一邊。


hd