Advertisement

脂肪失控 凸腩巨躉 41歲「厚切」杜如風 買桃花求姻緣

        主持旅遊節目、被高登巴打賜封「世界級港女」的杜如風(Helen),近年撇唔甩肥膏,包包面脹爆上鏡。去年,她飽受喪父之痛,搞到濕疹發作,長期食類固醇,肥腫難分更加嚴重。日前下午,「厚切Helen」偕友行維園年宵。只見淡妝中女再度發福,凸腩巨躉,脂肪爆晒棚,目測體重直迫150磅。不過「車軚中女」dry咗幾年渴望拍拖,連睇幾檔桃花,最後購下一棵大桃花鎮家居,急求雞年有好姻緣呢!採訪 : 梁志明

        出晒名癲、喪、狂的41歲杜如風,因主持旅遊節目講嘢「甩甩咳咳」又自戀自大,兼手部動作奇多,極速獲封「世界級港女」。你有你鬧,佢有佢繼續吸金搵銀,早前有旅行社睇中杜小姐,搵佢處女下海首度帶團,嚟緊新春帶二十位富貴團友豪玩日本本州5天,團費盛惠88,888元,連佢呢位星級導遊都話貴。即將起行,剩女杜如風早前心心眼話:「呢次要釣金龜,初二出發,初三行禮,緊接度蜜月。」恨嫁恨到出晒面。

腳傷未瘉要攙扶

  本周一(23日)下午四時,愈肥愈多job的Helen淡妝戴墨鏡和黑帽遮包包面現身銅鑼灣。一身白tee運動褲的她,身形十級圓潤,福氣十足。她先和一圈外女友人在利園行逛,未幾有一圈外男友人前來會合,一行人向柏寧酒店方向行,等杜小姐撳錢。男女友人又不時細心左右扶實腳傷未瘉的Helen,怕她整親膝頭。之後三人行入維園年宵市場,見Helen主力揀蘭花和桃花。逗留約半小時,就購下幾種賀年花,急不及待返家等送貨佈置,望新春行番個桃花運。

hd