雞年做人夫 泥鯭拖未婚妻睇婚戒

        踏入2017年,娛圈喜事連連,持續生仔潮外,陳宇琛、離婚嘅前女騎師江碧蕙等都入紙結婚。去年自組公司的RubberBand(RB)成員泥鯭,上月亦求婚成功,快將「從此被困」,與圈外嫩口女友阿欣拉埋天窗。日前下午,私生活十級低調的「翻版林海峰」泥鯭拖女友去銅鑼灣睇婚戒,再連體落時代廣場睇家品和貼頭買餸,呢對見習夫婦,已經有夫妻相啦!

        RB四子中,主音6號(繆浩昌)、結他手阿偉(李兆偉)和隊長兼結他手阿正(馮庭正)已經做咗老襯,剩低鼓佬泥鯭仲係單身。泥鯭有個拍拖多年的圈外女友阿欣。阿欣皮膚白淨、身材的骰有啲肉,個樣幾乖巧又好甜。上月,泥鯭向女友求婚成功,兩人罕有喺網上貼頭公告喜訊,見泥鯭握住女友左手晒求婚戒指放閃,兩人笑容甜到漏!

  踏入雞年好快做老襯的泥鯭,日前下午4時帶女友去銅鑼灣時代廣場睇婚戒。二人在Tiffany & Co.坐低試婚戒。揀足15分鐘,無收穫就轉戰地庫商場。以往拍拖,愛低調的泥鯭好少當街拖女,依家準備做人夫,就大方拖實未婚妻,宣示主權。睇吓家品,然後買餸。揀了一堆生果、肉類和蔬菜,返家玩煮飯仔,平日生活早已儼如兩夫妻啦。

採訪 : 李權威

hd