孕婦女神氣質出巡 巨肚謝安琪隨時生

        女神謝安琪(Kay)育有9歲囝囝張瞻,去年9月中再有喜訊,現正等待雞年B女出世。日前傍晚,影視紅人張繼聰Man爆「一拖三」,帶妻兒及腹中baby一家四口去尖沙咀開飯。預產期為下月的Kay,由於勁發福,孕婦女神刻意全身黑色密冚肥肉。只見肚大如籮的淡妝星媽,步出時散發陣陣星味。不過人妻原有瓜子面及身形變腫,個肚又巨,睇怕要執定「走佬袋」,隨時生得囉!

採訪 : 李權威

        下月就40歲的女神Kay,去年成功再佗B,仲好理想佗B女湊成「好」字。爆肌丈夫張繼聰一力孭起頭家,家住大埔比華利山別墅的張氏,早前更由二千多呎舊居搬到同屋苑四千多呎獨立屋,迎接小公主。

  本周情人節,張繼聰帶老婆到屋企寓所簡單食飯低調慶祝。日前傍晚就補番數,大肚Kay與丈夫兒子一家三口出尖咀K11商場開飯。見他們早已買了幾袋戰利品,仲有盒cake畀「兩母女」做消夜。只見佗B其間成日大呻「好肥好難影到一張正常相」的孕婦女神,當日刻意全身黑色密冚肥肉,面頰圓潤氣色好。兩母子背住門口卡位坐,一家點了海南雞飯及兩個小菜,有湯有肉有菜,大肚婆食得健康。

星級夫婦親民

  食至尾聲,阿聰發現記者,即chok行步出同記者寒暄,反轉cap帽戴的「rock仔」瞻瞻亦好奇跟實父親。之後,阿聰負責埋單跟手落樓取泊車優惠,再折返陪妻兒走人。見巨肚Kay起身有啲難度,需要老公攙扶,然後拖實乖仔離開。淡妝靚媽keep住好有氣質星味和人氣老公步出,仲同店員和食客揮手及微笑,超級親民。最後靚靚孕婦同記者揮手say hi,一家就搭(車立)攞車返家。

hd