Advertisement

一拖二買廚具 絕世好婆媳 王祖藍億元屋開Party

        37歲的王祖藍,自在內地參與《百變大咖秀》後,再升呢拍《奔跑吧兄弟》(強國版Running Man)在內地爆紅,仲極速賺夠籌碼連買三個總值約1.6億物業,成億元土豪。早前,祖藍拍完無線新劇《老表,畢業喇!》後,即一拖二帶母親及愛妻李亞男,踩落油麻地購買迷你雪櫃、廚具餐碟等,準備在億元Penthouse開party。其間,高妹王太一直傍實奶奶有講有笑,婆媳關係十級融洽,唔怪得祖藍咁放心返內地賺人仔啦!採訪 ︰ 李權威

        近年,王祖藍成為內地人氣綜藝節目主持,有指他目前身價飆升至一百二十萬一集真人騷,可謂名利雙收。今年,他再挾土炮劇《老表,畢業喇!》回歸。日前,新劇正式煞科,加上祖藍難得在港,就打算在其頂層連私人空中泳池複式豪宅,連環開party。其中一日招呼《老表》劇中藝員慶祝煞科。

買打邊爐餐具

  日前下午5時許,中間分界的王祖藍「一拖二」現身油麻地上海街。該區集中售賣廚房用品,可一站式買晒爐具、餐具等,好方便。見祖藍和四眼淡妝愛妻,以及餅印祖藍媽,連睇幾間店揀嘢。未幾,即睇中一個三千六百九十元、約3呎高的迷你雪櫃,可放大量凍肉和飲品等,BBQ最啱使。見王太手上有個file,應該係做足功課先去買嘢,好細心呢。之後,婆媳二人等包貨畀錢;祖藍把握時間再去另一間店睇餐具。夫婦分頭掃貨後,三人轉戰樓上舖大手選購碗碟、打邊爐篩子等,逗留約十五分鐘,就落樓等職員包貨準備離開。臨走時,祖藍發現本報,即禮貌同記者揮揮手微笑,問他買咁多廚具係咪開P?他笑笑口無回應,只說:「辛苦晒嘞!bye bye!」隨即走人。

hd