終極上訴得直 風騷揀眼鏡 陳志雲露勝利笑容

        無線電視前業務總經理陳志雲,與前經理人叢培崑09年被指收受利益案,案件糾纏7年後,昨日(14日)志雲大師終極上訴得直,可以舒一口氣。他即在facebook留言謂感恩能夠「在晴朗的一天出發」。判決前一日(13日),本報在金鐘太古廣場巧遇志雲大師。見他在店內揀眼鏡時,不時風騷笑笑口,心情超靚,似乎對官司好有信心,打算去配副新眼鏡,一切從新開始呢!採訪 ︰ 張詠森、李維隆

        58歲的陳志雲被指在09年出席奧海城倒數活動,主持《志雲飯局》而「秘撈」收酬十一萬兩千元。律政司兩度上訴。今年2月,上訴庭終下令原審法官改判他串謀使代理人收受利益罪成,被判罰款八萬四千元。他不服,提出「終極上訴」獲受理。等判其間,志雲大師似乎未受官司影響心情,日前仲抽空睇「神奇小子」曹星如(Rex)對戰31歲日本拳王向井寬史的大賽,直撃Rex二十一連勝。

新眼鏡 新開始

  「終極上訴」前夕,陳志雲前日下午四時許獨自現身金鐘太古廣場揀眼鏡。只見西裝骨骨的志雲大師,坐低猛揀眼鏡。連試五、六款圓形膠框眼鏡,其間與高大男店員有講有笑,心情甚佳。揀揀吓,除下眼鏡的他試新眼鏡時,仲拜託店員用其手機影相,再睇相揀款。逗留約半小時,心情輕鬆常展露笑容的陳志雲有決定,購下一副新眼鏡,寓意有個新的好開始!符合晒他判決後的感想:「霧霾始終會有散去的一天」,睇嘢可以清啲啦!

hd