Advertisement

被讚演技有進步 坤哥堅持未夠班攞金像獎

        15年尾,入行七年嘅吳業坤 (坤哥)終憑《原來她不夠愛我》爆紅,去年8月首登紅館舉行處男音樂會,甚至成功連任商台的「叱咤樂壇我最喜愛的男歌手」,更憑電影《幸運是我》獲提名今屆電影金像獎「最佳新演員」,26歲嘅坤哥坦言真係好驚喜:「本身以為世界好大,原來仲可以咁廣闊,100歲唔死都有新世界出現。」

        自認演技低Level的吳業坤喺TVB劇《迷》入面因為心痛狂喊,眼鏡起霧一幕再現,觀眾睇到好心酸,仲讚坤哥演技有進步。坤哥話拍攝呢兩場戲情緒真係好波動,「簡直將小宇宙燃燒到極限」,加上正值演唱會前夕,他不能分心要專心演好戲:「唔想拖累阿田,好彩拍咗兩個月先拍到呢場戲,我可以完全代入角色,埋位有情緒。阿田好友善冇畀壓力我,仲塞錢入我袋,叫我『你要做好啲呀,呢啲機會唔係成日有。』有時親身嘗試過先知道乜嘢叫做投入,正如未食過A5和牛係唔知有幾好食,同到阿田合作真係好運,有佢喺度先可以帶到我入戲。」

睇好胡子彤

  坤哥睇返兩年前嘅作品《幸運是我》覺得仲有好大進步空間:「我知道演戲係要點,但做唔做得到係另一回事,o依家我會設計同思考角色。當日監製搵我演粗豪車房仔呢個角色,係想攞個反差位,想我同戲中個角色好唔同,戲中會好惡咁鬧女友,所以梳咗個All Back頭配合番,以前做開主持同歌手對本身形象較執着,原來做演員要放低自己去做第二個人,家陣我要學習相信係第2個人,必須簡單從外形開始着手。」

  對於獲獎機會,坤哥笑說:「提名當攞獎啦,因為得到提名經已係一個肯定。當然我有幻想過如戲名咁幸運是我,不過我分得清現實同幻想嘅,我只得10分1機會,應該《點五步》嘅胡子彤同談善言機會較大。」

採訪:方騫平

hd