劉華出院鬆口氣 王晶孖老婆拍拖睇戲

        成功拉攏劉德華和甄子丹合拍新片《追龍》的王晶，早前揚言電影只欠後期配音，故會靜待劉華完全康復後才繼續進行，手頭上工作唔急得，王晶亦忙裏偷閒同老婆去圓方拍拖睇戲，現場見王晶散場後即急不及待拿出手機搜尋心水餐廳，等老婆去廁所的片刻，王晶更走到附近食店揭餐牌，對食有要求的王晶睇完嘴扁扁，諗兩諗便call司機轉場開飯。

        難得請得郁兩位影壇大哥埋位合作，王晶對新片《追龍》可謂仆心仆命，由泰國跟到去佛山，日日留守片場執劇本，雖然電影已完成拍攝，但因劉華盆骨撕裂要閉門養傷，故所有後期工作全部叫停。

散場即loop手機

　　靜待劉華養傷期間，王晶亦趁機休息，日前孖住老婆到圓方拍拖睇戲，散場一刻已是晚飯時段，王晶急不及待拿出手機搜尋心水食店，全程耷低頭起勢按，王太則慢步尾隨，雖然圓方食店多的是，但對食有要求的王晶似乎睇唔啱心水，在附近食店遊了一圈後，王晶待太太去完廁所即急call司機轉場開飯，沿途兩公婆再次發揮小宇宙，狂loop手機覓食，都啱，難得有時間當然要食餐好。

採訪：李維隆