Advertisement

賭王仔生活貼地 何猷啟 有車唔坐逼港鐵

        賭王何鴻燊的公子好有骨氣,好似四房猷君因「無撻朵」,搞到半夜陪friend瞓機場。而三房兒子何猷啟,26歲仔年輕有為,早前與朋友夾份做手機遊戲生意,成功靠自己雙手!不過何公子平日生活好貼地,無掛着「名人」包袱。日前下午,猷啟一身波衫波褲好casual咁現身銅鑼灣,左撲右撲去撳機匯款後,有七人車唔坐,選搭港鐵去中環剪髮,一啲架子都無。

        賭王三房仔女超雲、超蓮和猷啟,早幾年因為家姐戀事多又靚女搶晒鏡,不過近年來就輪到超蓮的孖生弟弟猷啟上場。他除任東華三院總理,去年尾又首次創業,與幾個朋友夾80萬,再融資七位數搞手機遊戲。有腦有樣仲有個18歲以色列籍索模女友Angelika Nikolaeva,女方仲大爆二人發展至同居關係,恨死班港女。

  日前下午,猷啟一身casual look戴帽現身銅鑼灣。見他先去便利店買包喉糖,買完即用口咬實包裝,急不及待紓緩喉痛。然後急步行去糖街搵司機,放低嘢在七人車,再行去柏寧酒店二樓的銀行櫃員機撳錢。撳完一部,僅得百元現鈔,就再排過第二部取一疊五百大牛。撳咗兩、三萬元,猷啟行去附近找換店匯款,搞完即send訊息,好有交帶。其後,何家公子有車唔搭,獨自熟路走入港鐵站,搭兩個站去中環剪髮。

採訪︰梁志明

hd