Advertisement

為向囝囝證明曾是歌手 黃翊 消失樂壇20年復出唱歌

        TVB的《流行經典50強》請來一班「上世紀」歌手演出引起好大迴響,其中49歲的黃翊演繹昔日親自作曲填詞的《最愛的你》獲網民激讚。當年曾被喻為「張國榮接班人」的黃翊對突然被討論覺得好不可思議:「因為太耐無唱歌有諗過唔唱,但又想同個仔證明,爸爸以前真係一個歌手嚟㗎。」

        黃翊現已轉行經營大排檔,黃老闆每晚着住牛記笠記再束起小辮子開工,由執枱到落單、傳菜甚至倒垃圾一腳踢,接受訪問期間亦不時眼仔碌碌睇住班客人,甚至會突然彈起身,「幾多位呀?埋嚟呢邊啦!今日有豬肺靚湯,仲要唔要海鮮呀?」待客熱誠又貼心。11歲大兒子Wesley話完全唔敢相信爸爸係昔日偶像歌手,黃翊說:「囝囝細個問父母以前做乜職業?我話Daddy以前係歌星,佢聽完半信半疑,就算媽咪陳存正畀以前Daddy嘅相佢睇都無用,話呢個唔係Daddy,所以今次先出嚟唱番首歌。」

囝囝嫌唱得少

  黃翊之前亦因信心問題有啲驚,好彩有老婆鼓勵,「因為無唱歌20幾年,所以可以完全放低包袱,當晚震都冇震過,演出好順利好好玩,亦冇諗過有咁好反應,完show後我收到200幾個WhatsApp,好多朋友話:『你掂喎,快啲睇網上留言啦!』坦白講網絡世界同我唔多親近,第一次上網睇留言真係差啲流眼淚,網民大讚我有經歷後唱出另一個感覺,真係講中我心底話,好感動!」問到到場打氣嘅老婆同囝囝係咪好驚喜?「個死O靚仔冇特別反應,仲寸我:『我哋來回用咗兩個鐘,你剩係唱一首歌?』」黃翊強調無打算復出,但求開心過癮,娛樂到大家就心滿意足。他笑說:「最搞鬼仲有人搵我剪綵,又有好多食客拉埋家人落嚟搵我影相,有時去茶餐廳食嘢被拉住集郵,仲打折同請我食甜品,哈!原來做名人咁有着數喎。」

採訪:方騫平

hd