感激娘家有情有義 張紋嘉離巢主力演戲

        張紋嘉(Crystal)跟舊東家合作10年,最近雖宣佈約滿離巢外闖,但娘家依然有情有義,為她推出最後一首歌《少女的球鞋》,正好見證她這10年的成長。獨立發展後, Crystal會主力向演戲方面發展,除了在港爭取電影、電視和舞台劇的演出機會外,還會遙控到美國面試,尋求更多出路。

        07年,Crystal以跳唱女團HotCha出道,直到14年拆夥單飛,轉眼已出道10個年頭,《少女的球鞋》正好紀念這段成長路,「呢首歌其實係舞台劇《少女的球鞋》嘅主題曲,個劇就係講一個女仔由着球鞋到着高踭鞋嘅成長故事。」

大個女要獨立

  Crystal雖剛跟公司約滿,但公司仍為她出新歌,令她很感動,「公司真係好有情有義,約滿都照樣幫我出歌同派台,佢哋仲話有咩問題,隨時可以搵佢哋幫手。(咁點解唔續約呢?)公司以音樂為主,但係自己未來好想向演戲方面發展,既然大家唔同路向咪分開吓囉!自己都大個女,係時候試吓獨立啦!」

  以往有娘家照顧,現在乜都靠自己,Crystal起初很不適應,「o依家所有工作由自己安排,都係一種磨練。」講到目標,Crystal只想演戲,「無論係電影、電視定係舞台劇都想做,仲會Keep住寄片去美國面試,嗰邊對識國語同英文嘅亞洲面孔演員好渴求,平均每兩星期就有面試機會,自己唔會放過任何機會。」

採訪:杜淑霞

hd