搭上「好勝小三」何雁詩惹禍 賤男鄭俊弘 同老闆擘面遭雪藏

        近日,33歲的鄭俊弘(Fred)被指一腳踏兩船,背住有米未婚妻beebs搭上24歲何雁詩(Stephanie),形象一鋪清袋,被封為「世紀賤男」!事件引爆後,Fred和「好勝小三」Step先夾口供唔認拍拖,男方唱片公司老闆何哲圖(Herman)亦急拆彈,堅稱二人係朋友。豈料翌日(6日),新拖友十指緊扣現身機場,「世紀一拖」認愛同時,亦狠摑Herman一巴掌。據悉,Fred難逃雪藏處分,傳紅館個唱也被取消。但Fred唔認作反,堅持說:「挺身呢個行為係男人必須要做嘅動作!」以為Man爆護新女,點知搞到同老闆反目。採訪:方騫平

        鄭俊弘背棄婚約、同時暗撻何雁詩齊被公審。機場「世紀一拖」,二人直認之前做了「大話精」,但仍未能挽回負評,被姜文杰留言直指是「狗男女」。上周六(8日)下午,鄭俊弘「出事」後首度現身公開場合,唯獨之前連續兩日做「拆彈專家」的何哲圖就無現身,Fred死撐:「周六放假嘛!」問到Herman係咪好嬲?Fred一臉尷尬說:「我同Herman都有聯絡,佢無嬲我。不過壓力真係好大。挺身保護女方係男人必須做哋,我哋有共識會互相支持一直行落去。」

音樂Job煞停

據悉Herman堅嬲,一聲令下Fred的音樂工作全部煞停,怒掟入雪櫃。好彩TVB監製王心慰,6月開新劇話預阿Fred。不過,據Fred密友爆料,捱了四年先成為「TVB首席男歌手」的鄭俊弘其實唔想得罪公司,反而係有錢女何雁詩一手策動,密友爆:「Step係一個好勝心強嘅女仔,專愛做『小三』,除曾硬撬張曦雯男友Wataru,早喺14年都有發功狂冧環星唱片太子爺張子丰,當年兩人拍合唱歌《線上情歌》MV,Step明知對方有女友,都大發姣功,因為當時Step同樣有男友,四角關係維持了好幾個月。今次Step又再搶灘成功,就威脅新仔高調拖手認愛。」

密友仲話Step對何哲圖早有心病:「Step09年參加完《超級巨聲》後未獲Herman垂青開始耿耿於懷。直到兩年前,好友鄭俊弘、許廷鏗等做說客,成功薦入星夢娛樂,不過她長期被投閒置散,加上被30歲菊梓喬遲來先上岸被力捧,好勝Step一於拖埋男友向公司作反。」

hd