進擊女 酒吧摸黑談心 陳瀅晒腿 秘會方力申

        27歲醒目女陳瀅(Jeannie),過往男友非富則貴,曾速擒賭王四房公子何猷亨、億元失婚人夫「九肚山方力申」劉德俊等。不過進擊女又點會停手!據悉,多年來好迷方力申嘅Jeannie,月前終於成功撻着37歲真人男神方力申,唔使再搵同小方撞樣的「愛的替身」做男友。日前凌晨,春風滿面的陳瀅晒腿現身蘭桂坊酒吧秘密見新歡。為保愛苗,兩人專登背門口貼頭密會,談心兩小時後,即孖好友分頭走人。採訪 : 張詠森、李權威、梁志明

        入行7年的陳瀅,最大成就係15年搭上賭王公子何猷亨。當年何公子為將女友私有化,有指猷亨安排她入住母親梁安琪名下的九龍站君臨天下豪宅。兩人拍拖大半年甜蜜蜜,惜最終分手。去年尾,進擊女被影到送上門,去「翻版方力申」劉德俊九肚山6千呎獨立屋,惜戀情見光死。陳瀅吸取教訓,揚言「再拍拖會低調」。

  據了解,好冧大隻仔又好愛小方嘅陳瀅,經好友穿針引線下,月前已成功媾掂佢like足十年的男神方力申。方力申(小方)與拍拖十年的鄧麗欣分手剛過一年,一年間竟出現4位緋聞女友,先後有大台新咪神張秀文、As One卜卜脆成員Chloe、美選女張沛樂(沙律)等,最爆炸性係指小方和賭王三房千金何超蓮譜出戀曲。小方未揀定,所以同陳瀅剛撻着都唔敢張揚。

嬌嗲姣O氹

  日前晚上凌晨十二時,穿長白tee當裙仔晒小肥腿的陳瀅,急拖好姊妹糖妹(黃山怡)行去雲咸街一地舖酒吧見新仔。她和小方刻意背向門口並肩坐。女方隨即展開燦爛笑容,又主動哄埋小方身邊咬耳仔。二人愈傾愈埋,女方不時拍打男友,嬌嗲姣O氹,大施冧功,男友好受落。穿上23號字樣tee的小方點了杯雞尾酒畀女友,兩人貼頭睇手機,活在二人世界。身邊的四眼糖妹好識做,自顧自玩手機悶飲,替星級情侶做煙幕。秘會近兩小時,陳瀅與悶樣糖妹先行離開,去附近的樓上吧趕下場。十五分鐘後,小方才與四眼男友人起身走,然後打的回家。

hd