Advertisement

踩入樂壇做歌手 顏卓靈:希望走出自己風格!

憑《狂舞派》成名的顏卓靈,過去四年片約不斷,堅持完成大學課程的她邊拍戲邊返學,剛捱過浸大畢業,顏卓靈又宣佈要踩入樂壇做歌手,新作《閃光》感覺清新,有別一般大眾K歌,「《閃光》是首非主流音樂,或許未必人人啱唱,但只要hit到,非主流都可變成主流,首歌想提示大家,你每日都可以脫殼,每日都可以做一個全新的我,令自己發亮發光,哪怕只係一剎那,好過你hea喺度乜唔做。」顏卓靈坦言不想隨波逐流,故計劃中的五首作品風格不一,「唱歌講感覺,我對這個圈一無所知,所以要不斷試,希望走出自己風格。」

        顏卓靈平日很愛笑,遇上自己喜歡的話題會侃侃而談,然而這次主題講音樂,作為樂壇新丁的她明顯緊張,說話沒尾聲,有一句沒一句的回應,「《閃光》找了何秉監製,佢好肯畀我試,原先我想降半度唱得輕鬆點,但原來降半度唱就變成主流K歌,出來效果唔得重新再錄,呢首歌感覺清新輕快,但下一首歌就會完全打破這格調,今年計劃出的五首歌都會不同班底和風格,我沒特定方向,不想創作有框框。」

  忙足三日唱片宣傳,顏卓靈即起行往內蒙為電影開工,「我今次角色唔係人,加上這角色本身不是搵女仔演的,感覺好大挑戰!其實去年拍的三部戲今年都陸續會上映,有跟鄭中基合作的《大樂師:為愛配樂》,自己好期待,因件事出嚟好靚;第二部係感覺唔真實又好漫畫化的《今晚打喪屍》,拍攝時係有點不知所措,但到配音先知原來可以玩到咁,所以有機會再拍續集都會再玩;第三部係魏德聖監製的《轉彎之後》,講踩單車環島遊,戲中一人分飾兩角,挑戰性好高。」

採訪:彭保迦 Hair︰Hugo@Toni & Guy IFC

         Make up︰Vinci Tsang Outfit︰MARYLING Shoes︰Venilla suite@ITHK


hd