行到邊都被集郵 阮兆祥笑笑口任影

        阮兆祥入行超過30年,負面新聞唔太多,最新鮮係舊年佢為咗接女友上車而喺車龍中切雙白線,繼而逆線行車約60米,網友狂鬧離晒譜,好彩祥仔即時耍冧,一句下次唔會化解危機。有錯肯認自然受人愛戴,所以祥仔無論買外賣定去便利店增值都被街坊要求合照,當事人無所謂,笑笑口任影,同人影張相自己無蝕底,對方又開心,何樂而不為?

        簽咗王祖藍間「手工藝創作有限公司」嘅祥仔近日趕拍50周年台慶劇《溏心風暴3》,佢喺劇中同陳敏之係一對,下個月49歲嘅佢明白自己位置,有劇拍有工開有得食有得玩已心滿意足,做人知足好緊要。

自拍無難度

  當日下晝,着到一身紅嘅祥仔去銅鑼灣渣甸街買車仔麵,等候其間有街坊瞄到佢即要求合照,等緊嘢無嘢做,祥仔無所謂仲幫手揸機高抄自拍,兩個人都可以瘦瘦同美美啊。然後車仔麵旁的燒臘師傅又心思思叫合照,祥仔主動行埋去,師傅仔勁開心,等完外賣行去便利店增值都被捕獲,有女Fans畀完錢行快兩步截住祥仔,1、2、3笑。做咗自拍大使嘅祥仔拎住外賣行去禮頓中心再駕車離開。

採訪:梁志明

hd