Advertisement

「半桶水」廚藝夫妻 梁漢文買餸 老婆做「煮婦」

        近排忙宣傳新歌《終身贊助》的梁漢文(Edmond),自婚後開始煮飯,笑稱自己是「住家菜」,又爆自己唔識下廚,老婆廚藝亦麻麻。日前傍晚,黑超人夫偕老婆Karen(林文慧)去中環ifc的city'super買餸玩煮飯仔。見Edmond好落力揀材料,試完即買,行足大半小時,掃滿兩個購物籃,滿載而歸!

        住家男梁漢文與愛妻Karen結婚邁向9周年,愈來愈恩愛。早年,Edmond曾表示自愛妻患上乳癌,兩公婆就開始多在家煮飯,食得清淡及健康。他又自爆在舊居跟老婆煮飯仔時險些火燒廚房,自此廚房係他禁地。

  老公有陰影,靚太Karen戰勝病魔,近日就走去學廚。日前傍晚,Edmond兩夫婦連體去中環買餸。人夫戴上黑超型仔出巡,一直主動推住架車仔四圍去試食揀料,太太就在身後傍實。二人揀了一大堆蔬果,然後去揀芝士、parma ham、黑毛豬等。兩人試食parma ham,交流吓意見就入貨。而人夫揀芝士時又愛聞吓先,唔識煮都識得食嘛。而購買新鮮材料外,「半桶水」廚藝夫妻亦掃了幾盒碗麵、微波爐食物,餓起上來叮一叮就食得。

採訪 ︰ 張詠森

hd