做主席前去奧地利滑雪Relax 陳細潔遇上魔鬼教練

        「鯊魚女」陳細潔(Abbie)剛上任為保良局主席,早前她為了準備忙碌的工作而與大班朋友到奧地利St Anton滑雪放鬆吓。首次到當地天氣不錯,她更要挑戰超長雪道,但最難忘都是遇到「魔鬼教練」,日日不停操練3至4個鐘,她笑言瘦了3、4磅,故豪飲豪食都唔怕,難得當地海鮮美味又抵食,令她非常盡興。

        Abbie之前去過法國、瑞士和日本北海道滑雪,首次去奧地利St Anton,皆因是同行的好友譚毓楨(Jenny)提議,「佢話試吓啲新地方。」出發前她都擔心滑唔到,因當地落了場大雪停開,幸好一落機便放晴。她自言滑雪滑了20年,從未遇過一條咁長嘅雪道,「一次過滑落去要25分鐘,以前我得㗎,但o依家年紀開始大,所以要分開3、4次滑。」今次她更搵了個好Top的教練,令她瘦住返港,「最初叫佢慢慢嚟,點知佢試到我可以去到Hard Level,之後再難啲,仲要唔停,結果瘦咗3、4磅,從來都未試過。」

純滑雪無Shopping

  當地有好多酒吧,滑到攰她可以停低飲杯啤酒休息,曬吓太陽、欣賞吓風景都幾寫意。滑完大半天,她便去搵美食。當地食物令她驚喜萬分,「雖然都係一般嘅西餐,但價錢平過法國同瑞士一半,試過食一餐3個Course都係港幣400蚊,非常抵食!」而且當地海鮮好新鮮,最鍾意又香又滑的煎魚。問她有冇去Shopping時?她坦言:「之前去親滑雪都有,但今次真係冇,因為嗰度冇咩名牌又冇乜特別時裝好買。」

撰文:李佩儀

hd