范振鋒新簽女創作歌手 黃意雅下月出碟圓夢

        范振鋒去年簽約的創作女歌手黃意雅(Cynthia)自少鍾意唱歌,更懂得彈古箏、鋼琴和結他,中學畢業後更修讀Digital Music and Media高級文憑課程學製作。一心想與人分享自己音樂創作的她,前年決定自資出碟。籌備到去年9月時,她有幸認識阿范,阿范覺得她由作曲、填詞、編曲至後期製作能一手包辦隻碟好厲害,聽完她的Mini-Concert後決定簽她。Cynthia的最新大碟《Before 23》將於下月面世,首隻派台歌《失散》已於日前推出,她表現興奮,因夢想終可成真。

        Cynthia自少聽爸爸播放的流行曲而愛上唱歌,中小學均是合唱團成員。是否因愛唱歌而學習不同的樂器?她笑言:「其實我鍾意鋼琴多啲,但因有人送咗個古箏畀我哋,媽媽叫我學到八級先畀我學琴,我極速用三年時間達標,點知媽媽又叫我學耐啲。」她唯有在琴行自學,直至讀文憑時要學作曲,才正式搵老師學,還自學彈結他。學唱歌都有,「中四開始參加歌唱比賽,但經歷過幾次失敗,發覺可能係技巧上要改善,就搵老師學,果然真係有進步!」

首拍MV感尷尬

  其間她曾到不同的商場表演,認識了很多志同道合的朋友,並一齊創作了些歌曲。前年9月,她決定出碟。回想當時好辛苦,一邊教古箏和到商場表演賺生活費,一邊又忙於錄音,到隻碟差唔多完成時就認識了阿范,「我哋傾過個方向都啱,到阿范聽完我嘅Mini-Concert,佢讚我唱Live都得喎。」新碟《Before 23》下月就推出,首隻派台歌《失散》是她最喜歡的作品之一。她笑言新歌MV要跟公司藝人李嘉進一齊拍,但第一次見面就要抱抱勁尷尬,幸好出來的效果很好,她也很滿意。

採訪:李佩儀

hd