Advertisement

拍劇咁辛苦咪搞 湯寶如自資7位數出新歌

        無做主持20年的湯寶如(湯記)最近跟曹永廉、黎小田及薛家燕主持《流行經典50強》,無諗過節目反應好好,首集平均收視23.2點(約150萬觀眾收看),因此由原先只得5集添食到15集。對於重返幕前做主持,湯記自爆笑料百出:「第1、2日開工好似新人咁完全唔記得走位,仲重疊晒其他主持人要工作人員提示,搞到頻頻NG,又唔停咁講對白食螺絲,連阿廉都忍唔住叫我好似家燕姐咁要慢慢講,諗返起累到3位主持真係唔好意思。」 採訪:方騫平 場地:Fovea@中環蘭桂坊加州大廈

對於節目成功,湯寶如覺得節目形式及主持組合都有新鮮感,家燕與小田多年沒有合體;她和曹永廉就「九唔搭八」反而撞出火花:最搞笑佢啲fans見我成日喺節目度踩佢,以為我恰佢,其實係跟稿搞氣氛。我對佢拍劇較深刻,真係唔知佢出過碟,上網先知佢原來唱過《糊塗情感》,不過,佢就帶點尷尬話『唔好提喇!』做呢個節目真係好玩又有滿足感,我哋做主持同時會幫手請埋嘉賓,咁我負責搵返同期歌手,好似陳曉東同黃翊咁,尤以黃翊最受歡迎,網上點擊率好高,不過贊成見好就收,做完15集係時候要停。」

出新歌撐廣東歌

  至於可會回巢拍劇?她笑說不可能了:「之前我同張衛健相遇,佢話會幫手拍重頭劇《大帥哥》半年,我咁嘅年紀唔捱得啦,聽阿廉講,佢拍《深宮計》拍到早上6點食早餐時間,仲要拍單shot,有可能同一段要講足8次對白,拍得好辛苦,佢相信我係唔會習慣嘅,以前凌晨4點收廠都經已好極限了,我反而有興趣拍旅遊節目。」嚟緊湯記將會投資7位數字做廣東新歌《獨愛》兼拍MV在網上播。「冇諗過回本,當係還心願支持廣東歌,大家都知道唱片難做,我再唔做呢個行業就會死,而且鍾意唱歌嘅點都會唱,好似黎瑞恩、王馨平咁都有出返嚟啦,唯獨劉小慧忍得住。」




hd