Advertisement

懶理內地網民圍攻 秋生:我唔使跪低求饒!

        邱禮濤執導,黃秋生主演的新片《失眠》未上映已掀熱話,全因戲中有強姦、食人肉等話題情節,血腥又變態,有說這是秋生告別血腥暴力之作,「再演這類角色有咩意義?自己都覺得悶又冇挑戰性。」這天跟導演坐下接受訪問,談到近年常被內地網民圍攻要絕跡內地巿場時,秋生沒好氣地說:「鬧我嗰班可能係尼特族,攞住部電腦喺農村茅屋係咁篤,鬧我死、鬧我窮,要我跪地求饒,呢啲都係廢話,我好食好住,有樓有車有家庭,唔做都食過世,有咩咁慘?成日要人大聲嗌愛國要表宗,就算我要表宗都唔係同你表啦,你邊位?」

先後跟邱禮濤合作《八仙飯店之人肉叉燒包》、《伊波拉病毒》,黃秋生說《失眠》是第三部曲,而這次演繹更昇華到另一層次,他說:「以前做完呢類戲,出街會被人指住話『變態佬』,我諗今次唔會,純粹從一個演員去演一個角色出發。」身旁的邱禮濤大讚秋生拍攝劏肚切J場面沒半點退縮,「通常casting時已預計到演員會點做,比如《選老坐》會係我想像之內,但秋生這次跟《葉問終極一戰》一樣,完全超乎我想像。」

苦練日文演漢奸

  要揣摩兩個性格截然不同的角色,秋生自言冇難度,唯獨須演漢奸的他要極速操練日文埋位,「因日文跟英文、意大利文唔同,無根據可言,唯有死背。」導演爆秋生每次為演好角色都花盡時間,「佢上次拍《葉問》走去學成年詠春,返大陸拍攝又帶埋木人樁去,晚晚打到啪啪聲,演員能有這態度係好,就算你唔打得,外形體能都要有說服力。」

  說到曾志偉金像獎當晚口出狂言後被杜汶澤網上炮轟一事,向來敢言無畏的秋生說:「志偉同黑仔就算熟都無可能公開咁講,係好侮辱,至於杜汶澤我唔係太熟,可能佢知道內情都未定,點都好,我覺得做人唔好咁認真,做好自己嘢就得,因有時啲人話你唱你嘅嘢都未必係真,咁你又何須太認真呢?」







採訪:彭保迦  攝影:謝民光






hd