陪老婆Shopping零意見 黃浩然 雙手放後保鏢上身

        黃浩然喺TVB好多劇拍,事關佢有外形,觀眾緣又唔錯,咩叫觀眾緣?之前套《我瞞結婚了》大結局被網民狂插,但講到劇中有才華又專一又靚仔又有錢嘅黃浩然就依然讚好,呢啲就叫觀眾緣,鄭俊弘之前無,o依家呢三個字更加同佢無關係。

        日前下午,着恤衫老牛,好Chic好Smart嘅黃浩然現身銅鑼灣,見佢急急腳行去希慎嘅Apple Store,原來黃太一早喺嗰度行緊,一見到老婆,黃浩然無特別嘢講,總之老婆行去邊佢就跟去邊。

唔出聲默默支持

  雖然係兩子之母,但黃太仍然有型見佢行勻全間舖乜都睇吓,睇吓電腦配件,望望吓就會問吓店員,而黃生呢?雙手放後嘅佢一直企喺老婆隔籬貼到實,聽住老婆問人,睇住老婆揀嘢,佢無出聲,亦無出手,一路走來始終如一,就算見到老婆揀Apple Watch錶帶,佢都無出手試埋一份,好忍得。最後,黃太買咗外置Storage,而負責拎貨嘅黃浩然行去利園停車場拎車走人,而黃太就去時代廣場方向繼續行街。

採訪︰梁志明

hd