Advertisement

初來港變空虛小姐 Gin Lee 錄音玩新招

        Gin Lee(李幸倪)近日推出新歌《空姐》,意指「空虛的小姐」,她解釋初來港時經常一個人飛,感到份外孤單寂寞,幸好近年在港已認識了不少朋友,現在已有家的感覺。今次錄音她更挑戰自己,跟樂隊一同現場一Take過錄音,由於太好玩,她已考慮下次索性玩大啲加埋觀眾反應聲,開騷順道錄音。

         今次Gin Lee的專輯以「Live in the moment」(活在當下)做主題,她想起幾年前初來港時坐飛機的空虛感覺而構思出《空姐》,「可能嗰陣時,香港仲未有咁多朋友啦!其實每次單獨飛,喺候機室時得自己便有呢種空虛嘅感覺。」

一Take過錄音

  現在Gin若單獨飛依然會覺空虛,但已不覺孤單,「喺香港除咗朋友,上網仲有好多fans,依然返香港會覺得係返咗屋企。」向來出名唱功勁的Gin,錄音更嘗試挑戰高難度,「既然要活在當下,不如錄音都係記錄低嗰刻嘅感覺,大家都係一Take過冇下次,就好似人生一樣。」

  不過這形式,單是場地已考起Gin,「香港唔係有好多錄音室,可以容納咁多樂手一齊錄音。」為了有好效果,Gin事前如開演唱會一樣作準備,「我哋事前會採排,希望盡量唔使唱太多次去錄,但今次錄法真係覺得好好玩,或者會有Part 2,到時玩大啲喺現場開騷順便錄音,加埋觀眾反應仲正。」

採訪:杜淑霞

髮型:Eve Chiu@Fifth salon        

化妝:Circle Cheung(ndnco.co)

hd